Six Pack က လှဖို့သက်သက် လိုအပ်တာမဟုတ်ပါ
အရပ်ခေါ် Abs/ Six Pack လို့ ခေါ်တတ်ကြတဲ့ ဝမ်းဗိုက်ကြွက်သားကို လူအများစုကတော့ ကိုယ်ခန္ဓာအလှအတွက် ကြိုက်ကြတယ်ဆိုပေမယ့် တကယ်တမ်း သူ့ရဲ့ ကောင်းကျိုးတွေနဲ့ အရေးပါမှုတွေကိုတော့ လူသိနည်းနေသေးတာကို သတိထားမိပါတယ်။
ဝမ်းဗိုက်ကြွက်သားကို အဓိကအုပ်စုအနေနဲ့
၁။ Transversus Abdominis - အထူဆုံး ကြွက်သားအလွှာဖြစ်ပြီး ခန္ဓာကိုယ်အလယ်ပိုင်းရဲ့ အနေအထားကို တည်ငြိမ်စေပြီး ဝမ်းဗိုက်အတွင်းဖိအားကို ထိန်းပေးထားတယ်။
၂။ Rectus Abdominis - နံရိုးနဲ့ ဆီးခုံရိုးကြားမှာရှိတဲ့ ကြွက်သားဖြစ်ပြီး လေ့ကျင့်ခန်းလုပ်လို့ ချုံ့လိုက်တဲ့အခါ လူပြောများတဲ့ Six Pack အဖုအထစ်တွေ ဖြစ်လာပါတယ်။
၃။ External Oblique Muscles - Rectus Abdominis ရဲ့ တစ်ဖက်တစ်ချက်စီမှာရှိတဲ့ ကြွက်သားများဖြစ်ပြီး ခန္ဓာကိုယ်အလယ်ပိုင်းကို ကောင်းစွာ ကွေးနေအောင်၊ လှည့်ဆန့်နိုင်အောင် ကူညီပေးပါတယ်။ ဥပမာ - ညာဘက်ခြမ်းမှာရှိတဲ့ External Oblique Muscle က ဘယ်ဘက်ခြမ်းကို ကွေးနိုင်အောင် ကူညီပေးပါတယ်။
၄။ Internal Oblique Muscles - တင်ပဆုံရိုးအတွင်းမှာရှိပြီး External Oblique Muscles ရဲ့ ဆန့်ကျင်ဘက်ပုံစံ အလုပ်လုပ်ပါတယ်။ ဥပမာ - ဘယ်ဘက်ကို ကွေးဆန့်ဖို့ ဘယ်ဘက်မှာရှိတဲ့ Internal Oblique Muscle က ကူညီပေးပါတယ်။
Gym မှာ လေ့ကျင့်ခန်းလုပ်နေသူအများစု သိကြတဲ့ ခန္ဓာကိုယ်အလယ်ပိုင်း ကြွက်သားသန်မာခြင်း (Core Strength) မှာ ဝမ်းဗိုက်ကြွက်သားဟာလည်း တစ်ခုအပါအဝင်ဖြစ်ပါတယ်။ ဝမ်းဗိုက်ကြွက်သားရဲ့ ကောင်းကျိုးတွေကို ကြည့်မယ်ဆိုရင်
၁။ ခန္ဓာကိုယ်အလယ်ပိုင်းနဲ့ အောက်ပိုင်းကို ဟန်ချက်ညီစေဖို့ ထိန်းညှိပေးတဲ့ ကြွက်သား Link တစ်မျိုးပါပဲ။ ရင်အုပ်၊ ဝမ်းဗိုက်နဲ့ ခါးနောက်ပိုင်းဟာ Core Strength ထဲ ပါနေပြီး ထိုင်ထလုပ်တဲ့အခါ၊ ကုန်းလိုက်ပြီး ပစ္စည်းတွေ မတင်တဲ့အခါ၊ လေ့ကျင့်ခန်းလုပ်တဲ့အခါမှာ အဓိက အသုံးချပါတယ်။
၂။ လေ့ကျင့်ခန်းလုပ်တဲ့အခါနဲ့ အလေးအပင်တွေ မတင်တဲ့အခါ ခါးကို မထိခိုက်မိစေဖို့နဲ့ ကျောရိုးတည်ငြိမ်မှုကို မြင့်တက်စေဖို့နဲ့ လှုပ်ရှားလိုက်တဲ့အခါ ခါးရိုးလွဲခြင်းကနေ ကာကွယ်ပေးပါတယ်။
၃။ ခန္ဓာကိုယ်လှုပ်ရှားတဲ့အခါ၊ ထိုင်ထလုပ်တဲ့အခါ ကိုယ့်ရဲ့ ဟန်ချက်ကို ထိန်းပေးနိုင်ပြီး ကိုယ်နေဟန်ထား ပိုကြည့်ကောင်းလာစေတယ်။ ဒါ့အပြင် Core Strength ကို ပိုအားကောင်းလာစေတယ်။
၄။ အလေးအပင်ကို မတဲ့နေရာမှာ ရင်အုပ်နဲ့ လက်မောင်းကြွက်သားတွေအပြင် ဝမ်းဗိုက်ကြွက်သားတွေကလည်း အလေးအပင်ကို အောက်ကနေ ပင့်ထောက်ပေးနိုင်သလို ခန္ဓာကိုယ်ရဲ့ လေ့ကျင့်ခန်းဒဏ် ခံနိုင်ရည်ကိုလည်း မြှင့်တင်ပေးလို့လည်း လေ့ကျင့်ခန်းလုပ်တဲ့အခါ အကောင်းဆုံးရလဒ်ကို အချိန်တိုအတွင်း ရအောင် ကူညီပေးနိုင်မှာပါ။
၅။ ဝမ်းဗိုက်ကြွက်သားကို သေချာလေ့ကျင့်ခန်းလုပ်ပေးခြင်းဖြင့် ဝမ်းဗိုက်နဲ့ ခါးမှာစုပုံနေတဲ့ အဆီပိုတွေကို လောင်ကျွမ်းစေတယ်။ ဒါ့အပြင် ဝမ်းဗိုက်ကြွက်သားထုတက်လာတဲ့အခါ ခန္ဓာကိုယ်ရဲ့ ဇီဝကမ္မဖြစ်ပျက်မှုတွေကို လျင်မြန်စေတဲ့အတွက် ကယ်လိုရီ ပိုမိုလောင်ကျွမ်းသွားစေပါတယ်။
ဒီအတွက် ဝမ်းဗိုက်ကြွက်သားထုတက်စေဖို့ လေ့ကျင့်ခန်းကို ရွေးချယ်တဲ့အခါ
- အိပ်ထမတင်လုပ်ခြင်း
- Bridge လေ့ကျင့်ခန်း
- Plank ထောက်ခြင်း
- ဒိုက်ထိုးခြင်း
- V-Up ဝမ်းဗိုက်လေ့ကျင့်ခန်း
- Side Plank ထောက်ခြင်း
- အေရိုးဗစ်လေ့ကျင့်ခန်း စတာတွေကို နည်းပြဆရာအကူအညီနဲ့ သေချာလေ့ကျင့်ပေးနိုင်ပါတယ်။
ရဲမျိုးမြတ်